Plantun de Prouvènço

Pèr coumpara dos planto d'encò nostre

Hormathophylla macrocarpa & Vallisneria spiralis

Hormathophylla macrocarpa

Brassicaceae Cruciferae

Nom en français : Alysson à gros fruits.

Descripcioun :
La gourbèio-d'or-di-gros-fru trachis en mato dins li roucas e sus li cresten venta di colo cauquiero dins l'uba de la "Valado dóu Rose". Es uno planto mai coumuno dóu coustat de l'Ardècho e d'un biais generau à l'ouèst dóu Rose. Se recounèis eisadamen emé si gros fru d'un pau mens d'un cm. Lis estile soun long de 2,5 à 3,5 mm e li grano soun bèn alado (fotò), au contro de sa cousino la gourbèio-d'or-espinouso, Hormatophylla spinosa, que trachis en "Basso Prouvènço".

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Pichoto planto lignouso
Taio : 10 à 30 cm
Fueio : alterno
Tipe bioulougico : Camefite
Cicle bioulougico : Planto renadivo

Gènre : Hormathophylla
Famiho : Brassicaceae
Famiho classico : Cruciferae

Ordre : Brassicales

Coulour de la flour : Blanco
Petalo : 4
Ø (o loungour) flour : 10 à 15 mm
Flourido : Printèms

Sòu : Ca
Autour basso e auto : 100 à 800 m
Aparado : Vo
Abriéu à jun

Liò : Roucas - Cresten venta
Estànci : Mesoumediterran à Subremediterran
Couroulougi : Mediterrano-Moutagnouso-Nord-Ouèst
Ref. sc. : Hormathophylla macrocarpa (DC.) P.Küpfer, 1974 (= Alyssum macrocarpum DC., 1821 )

Erbo-di-frisoun

Vallisneria spiralis

Hydrocharitaceae

Àutri noum : Embuscun, Limoun.

Noms en français : Vallisnérie, Vallisnérie en spirale.

Descripcioun :
L'erbo-di-frisoun es uno planto diouïco que fai de coulounìo emé si fiéu ; li fueio soun verdo, longo, plato e larjo de 10 à 15 mm. Pèr li flour leissaren counta F. Mistral (Mirèio, cant V) "(...) l'erbeto di frisoun ; - A dos floureto, separado - Bèn sus dos planto, e retirado (...) - Mai quand vèn de l'amour pèr éli la sesoun - Uno di flour, touto souleto, - Mounto sus l'aigo risouleto - E laisso au bon soulèu espandi soun boutoun ; (...) - I'a l'autro flour qu'es trefoulido, - E la vesès, d'amour emplido, - Que nado tant que pòu pèr ié faire un poutoun. - E, tant que pòu, se desfrisouno - De l'embuscun que l'empresouno"...

Usanço :
Li fueio sarien manjado dins l'Asìo dóu levant.